Una casa p' Aína: el proyeutu de la nueva sede social d'Aína encara un añu electoral decisivu, y queremos facelo mirando pal frente cola fuercia de quien tien vocación de romper el tableru políticu en 2027. Pa consiguilo fai falta daqué tan cenciello como fundamental: un espaciu propiu.

Una sede social nun ye namás un local. Ye'l llugar onde recibimos a quien s'acerca per primer vegada, onde producimos les idees que llueu se convierten en propuestes, onde nos formamos y onde nos atopamos quien creyemos qu'Asturies merez un polu políticu propiu, con voz ya identidá asturiana.

Queremos qu'esa casa seya realidá ensin comprometer la capacidá económica del partíu, ensin quita-y nin un euru a l'actividá política diaria. Poro, recurrimos al crowdfunding: porque esta sede tien de ñacer del compromisu coleutivu de quien quier forma parte d'una manera o d'otra d'esti proyeutu.

Poro, facemos un llamáu al activismu, a la ilusión y al enfotu pa ser quien a algamar un mínimu de 6.000 euros pa poder aniciar dignamente la dinámica nel nuevu espaciu, y un óptimu de 10.000 euros que nos dexaría equipar y acondicionar la sede coles garantíes que merez.

Esta va ser la casa abierta de toa persona que quiera construyir con nós. Un llugar de puertes abiertes, de trabayu compartíu y de futuru. Convidámoste a formar parte de los sos cimientos.